Falando de intimidade...

Isto ven a propósito do rebumbio xurdido despois de que visen a luz unhas fotos do bailarín Antonio Canales en actitudes... que eu defino como íntimas. Si, aínda que sexa nun lugar público. Pero a intimidade non sempre ten que ver coa ocultación, ou a soidade. O diccionario da RAG, define a palabra "íntimo" da seguinte maneira: "Que existe no máis profundo e interno dunha persoa". Non confirma en ningún momento que os feitos deban levarse a cabo nun ou noutro sitio.
Polo tanto, non vexo o por que de certas reaccións. Non sabemos se había xente arredor, non sabemos en que lugar da praia estaban eses homes... Mais coñecemos que un fotógrafo armado cunha cámara irrumpiu na intimidade de dúas persoas. E malia que eu non son das que adoptaría un actitude semellante en público, é ben certo que esceas similares teñen lugar tódolos días en moitos lugares abertos. Ou é que se se producen entre home e muller non teñen o mesmo impacto?
Como queira que sexa... "Que falen de min, aínda que sexa mal"... Non o digo eu, que o dixo Oscar Wilde. Pero eu estou tan ocupada querendo aos que me queren, que non teño tempo para odiar aos que me odian.
Remato cunha frase... perfecta: "Non se pode separar a paz da liberdade, porque ninguén pode estar en paz con si mesmo senón é libre". Démoslle vía libre as expresións de amor, que as guerras xa se fan notar soíñas... Bicos.